O Reino de Galiza: Coñecer o pasado para construírmos o futuro

Desde que Orgullo Galego comezou a súa andaina no ano 2016, a divulgación da nosa historia foi un dos principais obxectivos que nos marcamos. Neste campo, un dos períodos máis fascinantes como é o do Reino de Galiza tivo e ten moita importancia. Así, dentro das nosas humildes capacidades, publicamos infografías, artigos, historias e mesmo conversas con historiadores como Anselmo López Carreira que mereceu o premio do público do concurso Youtubeiras.

Neste ano 2022 a área de Cultura da Deputación da Coruña lanzou uns fondos para a divulgación de Proxectos Culturais do Reino de Galiza. A iniciativa foi un completo éxito e, cun límite de financiamento de 20 proxectos, presentáronse máis de 120 propostas.

Orgullo Galego tivo a enorme sorte de poder formar parte deses 20 proxectos escollidos polo xurado, onde podemos atopar documentais, roteiros, videoxogos, etc., en definitiva, moitísima calidade que mostra a riqueza e importancia que ten este período no conxunto do pobo malia o ocultamento ao que o teñen sometido.

Desde a comunidade decidimos dedicarlle moitos esforzos á nosa proposta, que baixo o título “O Reino de Galiza: Coñecer o pasado para construírmos o futuro”, busca a visibilizar do Reino de Galiza, mostrar a realidade con datos e rigorosidade, acompañados de expertos e expertas da materia que contribúan a mudar ese relato hexemónico que considera un dos reinos máis importantes de Europa como unha anécdota sen case percorrido.

Para mostrar a nosa proposta utilizaremos as redes sociais como non podía ser doutra maneira. Se internet e as redes sociais son o principal espazo de socialización da nosa sociedade, entendemos que a nosa historia ten que estar presente neste campo, para poder chegar a un público amplo diverso e poder complementar outros espazos de divulgación máis habituais.

Entre os meses de xullo e novembro desenvolveremos un ambicioso proxecto nas nosas redes sociais mais que terá como centro neurálxico o apartado web reino.orgullogalego.gal. Facebook, Twitch, Twitter, Instagram, Telegram ou Tik Tok contarán con numeroso material de diversos períodos do Reino de Galiza. Todo o proxecto contará cunha identidade gráfica propia vinculada á actual que xa temos.

Desde xa estamos traballando para coordinar datas e material, mais xa podemos pasar a presentar o que será o programa de Orgullo Galego que leva como título “O Reino de Galiza: Coñecer o pasado para construírmos o futuro”.

Programa

Conversas online no Twitch

  • Conversa con Anselmo López Carreira: Por que o Reino de Galicia desapareceu da historiografía española? Esta conversa será na segunda quincena de outubro, se non hai novidades, o 20 de outubro ás 20h30.
  • Xosé Ramón Hermida Meilán: Revoltas galegas contra Castela, do século XIII ao XV. Esta conversa será na primeira quincena de setembro.
  • Manuel Gago Mariño: Os viquingos: Relación e presenza no Reino de Galicia. A conversa será na primeira quincena de outubro.
  • Carlos Barros Guimeráns: As Revoltas Irmandiñas. A conversa será o día 12 de setembro ás 21h.
  • Eva Moreda Rodríguez: O Códice Calixtino: A música no Camiño de Santiago na Idade Media. O Reino de Galicia como centro de peregrinación. A conversa será o día 20 de xullo ás 21h.
  • Alexandre Peres Vigo: A imaxe do Reino de Galicia, dos galegos, e da súa lingua a finais da Idade Media. A conversa será na última semana de agosto.
  • Francisco Rodríguez Sánchez: A evolución política do reino medieval galego (séculos X-XV). A conversa será na última semana de outubro.
  • Héitor Picallo Fuentes: O ciclo artúrico e o escudo do Reino de Galicia. A conversa será na primeira semana de novembro.

Lembrar que todas estas conversas serán anunciadas con antelación nas nosas redes sociais e poderás seguilas en www.twitch.tv/orgullogalego sen necesidade de ter Twitch, aínda que é recomendábel facer conta e seguirnos para poder facer preguntas no chat. Nos días seguintes a cada conversa subirémola definitivamente á nosa canle de Youtube (e tamén poderás velos nesta propia web).

Artigos formativos

Estes artigos serán publicados nun apartado específico sobre o Reino de Galiza en reino.orgullogalego.gal e posteriormente estarán en todas as nosas redes sociais. Todos eles serán publicados entre os meses de xullo e novembro.

  • Xosé Ramón Hermida Meilán: O Reino de Galicia nas crónicas europeas.
  • Manuel Gago Mariño: Historias do Reino de Galicia.
  • Francisco Rodríguez Sánchez: A evolución política do reino medieval galego (séculos X-XV).
  • Carlos Barros Guimeráns: Artigo introdutorio ás Revoltas Irmandiñas.
  • Eva Moreda Rodríguez: Cantigas de Amigo: Música e natureza no Reino Medieval de Galicia.
  • Xosé Miguel Andrade Cernadas: 2 artigos: O Reino de Galicia entre o reinado de García e o de Afonso VII (1065-1157) // Galicia na cartografía da Europa medieval.
  • Alexandre Péres Vigo: As raíñas galegas no século X.
  • Borxa González Castro: Introdución histórica á existencia do Reino Suevo de Galiza. Comprendermos a súa importancia.
  • Borxa González Castro: A lingua do Reino de Galiza.
  • Héitor Picallo Fuentes: Cálices e trevos galegos na emblemática medieval europea.

Vídeos para Tik Tok

Nesta rede social subiremos 4 vídeos específicos sobre distintos períodos do Reino de Galiza.

Posteriormente divulgarémolos tamén nas outras redes sociais aínda que o obxectivo central é achegar a nosa historia a unha plataforma cunha presenza importantísima da xente máis nova. Sairán todos entre os meses de setembro e outubro, con datas de inicio do primeiro o 8 de setembro.

  • Que é o Reino Suevo?
  • Xoán de Gante, Duque de Lancáster e Rei de Galicia
  • Vitiza, un visigodo rei de Galicia
  • A importancia da fundación de Pontevedra no Reino de Galicia

Infografías para redes sociais

Desde o mes de setembro tamén comezaremos a divulgar en Facebook, Instagram, Twitter e Telegram varias infografías que buscan achegar contido máis sintético pero de igual importancia nestas redes sociais. En total serán 10 infografías que terán como data de inicio o martes 13 de setembro.

  • Existencia dun panteón real na Catedral de Santiago
  • Presenza do Reino de Galiza na Cartografía Europea
  • O Reino Suevo, primeiro reino dentro dos límites do Imperio Romano que acuñou moeda propia
  • Quen foi o rei Hermerico?
  • Raíñas de Galiza: Sancha e Urraca
  • Que é o priscilianismo?
  • Quen foi García II?
  • Que foi a Era Compostelá?
  • Maeloc. Unha pequena introdución ao bispo galego
  • O Reinado de Requiario

Para rematar, dicir que todas as publicacións levaran os cancelos #UnReinoPorDescubrir #ReinodeGaliza e #ReinodeGalicia.

Tamén a plataforma de Youtube servirá como espazo para subir pequenos cortes das conversas (shorts) e mesmo dos videos de Tik Tok. Este é o traballo que desenvolveremos nos vindeiros meses, seguide as nosas redes sociais para estar atentos e atentas a todos os anuncios e non perder nada, aínda que todo este contido quedará permanentemente subido na nosa páxina web e na canle de Youtube.

Pode que che interese:

Sancha e Dulce, as raíñas que puideron ser

A confrontación con Castela marcou a historia da Galiza desde mediados do século XI. A esta dialéctica responderon as diversas alternativas defendidas polas nosas clases dirixentes até a separación da área castelá do reino galego, formulada, primeiramente, polos monarcas Fernando I e Sancha I e sancionada polo seu neto Afonso VII. Nesta dinámica, a morte de Afonso VII abriu a porta a comezo da incorporación subordinada do Reino de Galiza á Coroa Castelá.

O galego no Reino de Galiza. Un idioma para un territorio marxinal?

Se ben é certo, que nos estudos sobre a lingua e nos manuais académicos adoitamos tocar a evolución da lingua galega ao longo dos séculos, semella contraditoria a crenza que di que o galego foi un idioma de prestixio no contexto da inexistencia dun Reino ou no mellor dos casos, da súa existencia mais cun papel meramente marxinal.

1 comentario en “O Reino de Galiza: Coñecer o pasado para construírmos o futuro”

Deixa un comentario